TUC Cymru yn lansio camau gweithredu ar aflonyddu rhywiol yn y gweithle

Heddiw (22 Mawrth), mae TUC Cymru yn lansio pecyn cymorth newydd ar fynd i’r afael ag aflonyddu rhywiol yn y gweithle.  Bydd yr adnodd - sydd wedi’i ysgrifennu ar y cyd gan Gymorth i Ferched Cymru - yn rhoi’r wybodaeth sydd ei hangen ar weithwyr yng Nghymru i fynd i’r afael â’r broblem hon yn y gweithle.

Mae aflonyddu rhywiol yn broblem hollbresennol mewn gweithleoedd – mae dros un o bob dwy ferch wedi’i ddioddef. Mae’r gyfradd hon yn codi i bron i ddwy o bob tair merch sydd rhwng 18 a 24 oed.

Wrth lansio’r pecyn cymorth yn adeilad y Pierhead ym Mae Caerdydd, dywedodd Shavanah Taj, Ysgrifennydd Cyffredinol TUC Cymru: “Ni ddylai neb fynd i’r gwaith yn ofni y gallan nhw ddioddef aflonyddu rhywiol. Mae aflonyddu rhywiol yn rhan o ddiwylliant ehangach, di-baid o drais rhywiol a chasineb at ferched. Nid yw’n weithred ddi-nod y dylid ei derbyn fel rhan anochel o fywyd bob dydd.

“Rydyn ni eisiau creu awyrgylch sy’n galluogi i weithwyr ddod ymlaen a gofyn am gymorth, yn ogystal â chael eu credu a’u helpu pan fydd arnyn nhw angen hynny.

O ran mynd i’r afael ag aflonyddu rhywiol, mae gennym ni i gyd ran i’w chwarae ac ni allwn ni wylio hynny’n digwydd heb weithredu. Rhaid i ni i gyd gwestiynu ymddygiadau sy’n gwneud i ferched deimlo’n llai diogel gartref, yn yr ysgol, yn gyhoeddus ac yn y gwaith.

“Mae TUC Cymru a’n hundebau llafur cysylltiedig yn arwain y gwaith hwn. Mae gan undebau, ein cynrychiolwyr a’n haelodau ran allweddol i’w chwarae yn dal cyflogwyr i gyfrif ac yn gwneud yn siŵr bod penaethiaid yn gwneud popeth o fewn eu gallu i atal aflonyddu rhywiol.

Mae pecyn cymorth TUC Cymru ar aflonyddu rhywiol yn cynnwys gwybodaeth a chymorth i helpu gweithwyr i wneud y canlynol:

➔ Adnabod aflonyddu rhywiol yn y gweithle

➔ Dal cyflogwyr i gyfrif er mwyn atal aflonyddu rhywiol rhag digwydd mewn gweithleoedd

➔ Ymgyrchu dros beidio â goddef dim aflonyddu rhywiol yn y gweithle, drwy amrywiaeth o fesurau ataliol