Aflonyddu Rhywiol yn y Gweithle
Mae’n broblem fyd-eang ac mae gwahanol rannau o’r byd yn delio â hi mewn gwahanol ffyrdd. Mae gennym gyfle i fynd i’r afael â’r broblem hon o ddifrif er mwyn gwneud Cymru y lle mwyaf diogel i weithio, byw a chymdeithasu.
Beth ydy aflonyddu rhywiol?
Mae aflonyddu rhywiol yn golygu dangos grym gyda’r bwriad o godi ofn ar berson arall, ei orfodi neu ei iselhau. Gall ddigwydd unrhyw le ac mewn unrhyw sefyllfa – wrth gerdded i lawr y stryd, yn yr ysgol, yn y gweithle, ar-lein neu yn eich cartref eich hun.
Gall aflonyddu rhywiol fod yn gorfforol, ar lafar neu yn ddi-eiriau.
Faint o broblem yw aflonyddu rhywiol yn y gweithle?
Mae aflonyddu rhywiol yn broblem hollbresennol mewn gweithleoedd – mae dros un o bob dwy ferch wedi’i ddioddef. Mae’r gyfradd hon yn codi i bron i ddwy o bob tair merch sydd rhwng 18 a 24 oed.
Mewn rhai sectorau, megis manwerthu, dywedwyd naw o bob deg merch ifanc wrth yr undeb USDAW eu bod wedi dioddef aflonyddu rhywiol yn y gweithle yn ystod y 12 mis blaenorol.
“Mae angen i bethau newid gan fod effeithiau aflonyddu rhywiol yn ddinistriol ac yn newid bywydau”
Sut gallaf fynd i’r afael ag aflonyddu rhywiol yn fy ngweithle?
Mae TUC Cymru wedi gweithio’n agos gyda Cymorth i Ferched Cymru i ddatblygu pecyn cymorth ar aflonyddu rhywiol yn y gweithle. Bydd y pecyn yn rhoi’r wybodaeth sydd ei hangen ar gynrychiolwyr undebau i fynd i’r afael ag aflonyddu rhywiol yn y gweithle a’i atal rhag digwydd.
Lawr lwythwch y pecyn cymorth i ddarganfod gwybodaeth a chanllawiau i’ch helpu i wneud y canlynol:
- Nodi aflonyddu rhywiol yn y gweithle a chynnig cymorth effeithiol i’r rhai sy’n ei ddioddef
- Deall y gyfraith mewn cysylltiad ag aflonyddu rhywiol yn y gweithle
- Cynnal sgyrsiau a thrafodaethau â chyflogwyr ar ran aelodau sydd wedi dioddef aflonyddu rhywiol yn y gweithle
- Gwneud yn siŵr bod cyflogwyr yn cyflawni eu cyfrifoldeb cyfreithiol i atal aflonyddu rhywiol yn y gweithle
- Ymgyrchu dros agwedd dim goddefgarwch at aflonyddu rhywiol yn y gweithle drwy amrywiaeth o fesurau ataliol
Ar adeg pan mae’n ymddangos bod pob math o aflonyddu rhywiol yn digwydd, bydd y pecyn cymorth hwn yn helpu cynrychiolwyr undebau i gefnogi’r sawl sy’n dioddef aflonyddu rhywiol ac i ddod â’r troseddwyr o flaen eu gwell.
Mae’n hanfodol ein bod ni i gyd yn ymrwymo i beidio â goddef dim aflonyddu rhywiol a bod cyflogwyr yn gallu darparu ymatebion sy’n deall trawma ac sy’n canolbwyntio ar yr unigolyn i’r gweithwyr hynny sy’n dod ymlaen, ochr yn ochr â gweithredu mecanweithiau cadarn ar gyfer atebolrwydd.
Arolwg ar Aflonyddu Rhywiol
Mae undebau yn gwybod yn iawn fod aflonyddu rhywiol yn y gweithle yn broblem eang, ond yng Nghymru rydyn ni’n brin o ddata i gadarnhau hynny.
Rydyn ni’n cynnal yr arolwg yma er mwyn darganfod rhagor ac i roi’r wybodaeth sydd ei hangen ar undebau i atal hyn rhag digwydd. Cafodd yr arolwg yma ei gynnal am y tro cyntaf yn 2019, ond mae’r gwaith wedi newid llawer ers hynny.
Rydyn ni am glywed eich barn hyd yn oed os gwnaethoch chi gwblhau’r arolwg diwethaf i sicrhau ein bod yn casglu cymaint o wybodaeth â phosib.