Mae angen adferiad gwyrdd ar Gymru meddai TUC Cymru
Er mwyn cael ‘adferiad gwyrdd a thrawsnewidiad cyfiawn’, mae’n rhaid cael ysgogiad economaidd enfawr i gyflawni ‘trawsnewidiad cyfiawn’ i economi sero-net i weithwyr a chymunedau Cymru.
Gallai Cymru weld enillion enfawr ar fuddsoddiad a miloedd o swyddi newydd pe bai gan Lywodraeth Cymru fwy o arian i fuddsoddi mewn adeiladwaith carbon isel, prosiectau ynni adnewyddadwy a chartrefi cynaliadwy.
Gydag ofnau o ddirwasgiad a diswyddiadau yn sgil argyfwng Covid, mae’r TUC yn galw ar Lywodraeth y DU i ddarparu cyllid ar gyfer cynllun gwarantu swyddi sy’n cefnogi datgarboneiddio. Mae TUC Cymru am weld y cynllun hwn yn cael ei reoli a’i ddarparu gan Lywodraeth Cymru mewn partneriaeth gymdeithasol ag undebau llafur a chyflogwyr Cymru.
Dywed yr adroddiad:
- Mae Cymru angen llwybr clir wedi’i ariannu tuag at sero-net sy’n manteisio i’r eithaf ar gyfleoedd i ddiogelu a chreu swyddi gwyrdd o ansawdd da sy’n cynnig ‘gwaith teg’.
- Mae’n rhaid i weithwyr gael llais canolog wrth gynllunio’r trawsnewidiad i ‘sero-net’, trwy drafod gyda Llywodraeth Cymru a thrwy ‘gytundebau trawsnewidiad’ yn y gweithle y cytunir arnynt gyda’r undebau.
- Rhaid i gyflogwyr weithio gyda’r undebau i ddatblygu mentrau cynaliadwyedd yn y gweithle.
- Mae angen mwy o gyllid ar weithwyr ar gyfer sgiliau er mwyn darparu llwybr clir tuag at swyddi newydd, mwy gwyrdd.
Dywedodd Shavanah Taj, Ysgrifenydd Cyffredinol TUC Cymru:
“Mae adeiladu’r adferiad o Coronafeirws yn her a wynebir unwaith mewn cenhedlaeth ond, mae hefyd yn gyfle i ni ddod at ein hunain yn well.
“Yng Nghymru, rydym yn credu mai’r catalydd fydd undebau llafur, cyflogwyr a’r llywodraeth yn cydweithio mewn partneriaeth gymdeithasol er mwyn cyflawni adferiad gwyrddach a thecach, a llwybr tuag at Gymru sero-net.
“Mae undebau llafur Cymru yn croesawu camau gan Lywodraeth Cymru i fynd i’r afael â’r argyfwng hinsawdd. Rydym yn cefnogi galwadau ar i Gymru gael mwy o hyblygrwydd yn ei phwerau benthyg er mwyn buddsoddi yn ei blaenoriaethau hinsawdd. Ond, ni all Cymru gyflawni’r trawsnewidiad hwn heb gynnydd sylweddol mewn cyllid, buddsoddiad a newidiadau polisi gan San Steffan.
“Mae mudiad yr undebau llafur yng Nghymru yn cefnogi’r frwydr i ddiogelu ein planed ar gyfer cenedlaethau’r dyfodol. Rydym yn cefnogi’r gweithwyr hynny y mae eu swyddi mewn perygl a gweithwyr iau sy’n ceisio cael mynediad i’r farchnad waith. Rhaid cymryd camau nawr er mwyn sicrhau y bydd yr adferiad a’r trawsnewidiad ôl-Covid i economi sero-net yn un cyfiawn a gwirioneddol.
