TUC Cymru yn croesawu'r cyhoeddiad ar y sector lletygarwch dan do a chyfleusterau ymarfer corff

“Rydym yn croesawu cyhoeddiadau Llywodraeth Cymru heddiw, sy’n adleisio ein galwadau yn gynharach yr wythnos hon.

Mae gweithwyr lletygarwch ledled Cymru yn pryderu am eu rhagolygon cyflogaeth yn y dyfodol ac am golli eu swyddi. Bydd cyhoeddiad heddiw yn rhoi lefel o sicrwydd i'r sector ac yn helpu atal diswyddiadau yn y dyfodol.

Mae TUC Cymru yn cefnogi dull Llywodraeth Cymru o weithredu yn seiliedig ar dystiolaeth. Rhaid i ddiogelwch gweithwyr barhau i fod yn brif flaenoriaeth. Ni ddylid rhoi unrhyw weithiwr mewn perygl er mwyn i fusnes oroesi. Rhaid i'r holl fusnesau perthnasol gynnal asesiad risg Covid-19 penodol, a rhoi mesurau diogelwch priodol mewn lle. Bydd gwneud y wybodaeth yma ar gael i’r cyhoedd yn rhoi’r hyder i bobl dod allan i gefnogi’r sector allweddol hyn sy’n cyflogi llawer o weithwyr ifanc a menywod. 

Rydym yn ailadrodd bod offer diogelwch personol (PPE), y strategaeth Profi, Olrhain, Diogelu (gyda chymorth ariannol i'r rhai sydd yn hunan-ynysu), mynediad i undebau llafur, cynrychiolwyr iechyd a diogelwch, a gorfodi rheolau iechyd a diogelwch a gwaith teg  yn allweddol i lwyddiant ailagor.”