Pryderon ynglŷn â gweithwyr yng Nghymru sy’n wynebu cael eu diswyddo

Dyddiad cyhoeddi

01 Jul 2020

Rydym yn bryderus iawn gydag adroddiadau bod nifer cynyddol o gyflogwyr yn derbyn rhybuddion diswyddo yn eu miloedd. Mae hyn yn cynnwys sawl cyflogwr sydd wedi derbyn grantiau a chefnogaeth ariannol gan Lywodraeth Cymru a’r Deyrnas Unedig. Rydym yn gofyn i’r cwmnïau hyn weithio â’r undebau i roi cefnogaeth weithredol i weithwyr yn ystod yr amser hwn o straen ac ansicrwydd.

Help ar gyfer gweithwyr sy’n poeni ynglŷn â chael eu diswyddo

Os ydych chi’n poeni am gael eich diswyddo, cofiwch fod eich undeb ar gael i’ch helpu chi drwy hyn. Gallwch chi:

Ymuno ag undeb os nad ydych chi eisoes yn aelod
Siarad â chynrychiolydd eich undeb ynglŷn â’r dewisiadau sydd ar gael i chi a sut y gallan nhw helpu
Cysylltu â Cymru’n Gweithio er mwyn derbyn cyngor ynglŷn ag ailhyfforddi a chael mynediad at gynlluniau fel ReAct - ffoniwch 08000284844
Cysylltu â’ch undeb ynglŷn â derbyn cefnogaeth gan Gronfa Ddysgu Undebau Cymru (CDdUC)
Ewch i’n gwedudalen i gael cyngor ynglŷn â diswyddo er mwyn cael mwy o wybodaeth a manylion cyswllt ar gyfer mwy o sefydliadau a all helpu.

Mae angen i lywodraethau weithredu er mwyn arbed swyddi

Os nad yw Llywodraethau’r DU a Chymru yn gweithredu yn gadarn yn awr, bydd yr arafu economaidd yn achosi risgiau anferth i swyddi a bywoliaethau pobl. Rydym yn wynebu’r posibilrwydd o raddfa ddiweithdra o 11 y cant eleni a bydd ein cymunedau tlotaf yn cael eu taro galetaf.

Dylai Llywodraethau’r DU a Chymru fuddsoddi yn awr er mwyn creu swyddi. Dylai hyn gynnwys swyddi:

band-eang cyflym
ymchwil a datblygu mewn technoleg datgarboneiddio mewn gweithgynhyrchu
ymestyn ac uwchraddio rhwydwaith y rheilffordd
adeiladu tai cymdeithasol newydd ac ôl-osod tai cymdeithasol presennol.

Mae TUC Cymru yn gweithio mewn partneriaeth â Llywodraeth Cymru er mwyn sicrhau bod ein hadferiad mor deg, cynhwysol a chyfiawn ag y gall fod. Bydd hyn angen gweithredu uchelgeisiol, cadarn er mwyn sicrhau bod cymaint o swyddi yn cael eu cadw ag sy’n bosibl. Mae’n rhaid i’r rhai hynny sy’n colli eu swyddi allu ailhyfforddi neu ddod o hyd i waith newydd mor gyflym ag sy’n bosibl. Yn ogystal, rydym yn lobïo am becyn ysgogi economaidd a fydd yn rhoi blaenoriaeth i swyddi gwyrdd a chyrraedd pob rhan o Gymru, fel nad oes yr un gymuned yn cael ei gadael ar ôl.

Ar lefel y DU, rydym yn gweithio gyda’n cydweithwyr yn y TUC i wthio Llywodraeth y DU i ddarparu’r cyllid angenrheidiol ar gyfer Cymru er mwyn gwireddu hyn. Roeddem yn siomedig iawn bod y Prif Weinidog wedi methu â chyhoeddi unrhyw gefnogaeth weladwy ar gyfer Cymru ar 30ain Mehefin. Byddwn yn parhau i frwydro dros y buddsoddiad hwn ynghyd â system nawdd cymdeithasol decach.

Darllenwch ein cyngor ar gyfer gweithwyr sy’n wynebu cael eu diswyddo

Join a union