Adroddiad Dysgwyr WULF 2025 – Dathlu Pŵer Dysgu yng Nghymru

Mae Cronfa Ddysgu Undebau Cymru (WULF) yn parhau i drawsnewid bywydau, gweithleoedd a chymunedau ar hyd a lled Cymru, ac mae Adroddiad Dysgwyr WULF 2025 sydd newydd gael ei gyhoeddi yn dangos pa mor hanfodol yw’r rhaglen hon.

Caiff WULF ei ariannu gan Lywodraeth Cymru a’i ddarparu drwy TUC Cymru a’r undebau llafur sy’n bartneriaid i ni. Mae’r gronfa hon yn agor y drws i ddysgu ar gyfer miloedd o weithwyr bob blwyddyn, gan roi iddynt yr hyder, y sgiliau a’r cyfleoedd sydd eu hangen arnynt i ffynnu.
Mae adroddiad eleni, sy’n seiliedig ar ymatebion dros 800 o ddysgwyr i’r arolwg, yn tynnu sylw unwaith eto at y ffaith nad rhaglen hyfforddi yn unig yw WULF – mae’n gatalydd ar gyfer twf personol, gwaith gwell a gweithleoedd tecach.

Prif Uchafbwyntiau Adroddiad 2025

Dysgu sy’n meithrin hyder ac yn newid bywydau

Dywedodd 90 y cant o ddysgwyr eu bod wedi cael hwb i’w hyder.
Dywedodd y rhan fwyaf o’r cyfranogwyr bod eu sgiliau cyfathrebu a’u hunangymhelliant wedi gwella; sef sgiliau y mae eu gwaith a’u cymunedau ehangach yn elwa arnynt.

Agor drysau i ddysgwyr heb fod yn draddodiadol

Mae WULF yn parhau i gyrraedd gweithwyr sy’n aml yn cael eu tangynrychioli ym maes dysgu oedolion:

Dywedodd 23 y cant o ddysgwyr fod ganddynt anabledd.
Roedd gan 36 y cant gyfrifoldebau gofal plant.
Roedd cyfran uwch na'r cyfartaledd yn dod o gefndiroedd ethnig leiafrifol.
Nid oedd hanner y cyfranogwyr wedi cael dim hyfforddiant ers dros chwe mis cyn ymgysylltu â WULF – sy’n dangos llwyddiant WULF o ran ailgysylltu pobl â dysgu gydol oes.

Effaith go iawn mewn gweithleoedd ledled Cymru

O’r rheini a gymerodd ran mewn cyrsiau hirach:

Roedd 85 y cant yn teimlo eu bod yn gallu cefnogi cydweithwyr yn well.
Dywedodd bron i draean ohonynt fod eu perfformiad yn y gwaith wedi gwella’n sylweddol.
Soniodd llawer am gael mwy o foddhad yn eu swydd, dyheadau cliriach o ran gyrfa, a gwell cydbwysedd rhwng bywyd a gwaith.

Ac yn bwysig iawn:

Llwyddodd 14 y cant i gael swydd newydd o ganlyniad uniongyrchol i’w hyfforddiant.
Ac o’r rheini, cafodd 76 y cant godiad cyflog.

Dysgu’n arwain at fwy o ddysgu

Mae WULF yn sbarduno ymrwymiad a datblygiad parhaus:

Roedd 87 y cant yn teimlo eu bod yn cael eu hannog i ddal ati i ddysgu.
Roedd 78 y cant naill ai wedi symud ymlaen i hyfforddiant pellach yn barod neu’n bwriadu gwneud hynny o fewn y flwyddyn nesaf.

O hyfforddiant a sgiliau digidol i hyfforddiant iechyd meddwl a DPP penodol i swydd, mae WULF yn galluogi gweithwyr i feithrin y sgiliau sydd eu hangen arnyn nhw heddiw ac ar gyfer y dyfodol.

Cyflawni drwy gryfder y mudiad undebau llafur

Mae cefnogaeth undebau yn dal i fod wrth galon WULF:

Roedd dysgwyr a oedd yn ymgysylltu â chynrychiolwyr undebau neu staff prosiect yn llawer mwy tebygol o adrodd canlyniadau cadarnhaol.
Ymysg y rhai nad ydynt yn aelodau o undeb, dewisodd chwech y cant ymuno ag undeb ar ôl cael mynediad at ddysgu gyda WULF – sy’n brawf o werth y cymorth dan arweiniad a geir gan undebau llafur.

Pam mae WULF yn bwysig

Mae WULF yn parhau i ddangos sut mae dysgu dan arweiniad undebau yn cael effaith sy’n newid bywydau – boed hynny’n helpu rhywun i ddychwelyd i ddysgu ar ôl degawdau, cefnogi dilyniant gyrfa, gwella llesiant meddyliol, neu roi’r sgiliau hanfodol i weithwyr ffynnu mewn economi sy’n newid.

Ar adeg pan mae gwaith teg, cynhwysiant ac uwchsgilio yn bwysicach nag erioed, mae WULF yn un o’r rhaglenni dysgu mwyaf llwyddiannus a grymusol yng Nghymru.

Join a union