Penodi Shavanah Taj yn Ysgrifennydd Cyffredinol parhaol TUC Cymru

Shavanah yw Ysgrifennydd Cyffredinol BAME cyntaf TUC Cymru. Ymunodd o’r Undeb Gwasanaethau Cyhoeddus a Masnachol (PCS), lle’r oedd yn Ysgrifennydd Cymru o 2013. 

TUC Cymru yw’r corff ambarél ar gyfer yr undebau llafur ac mae’n cynrychioli 48 o undebau cysylltiedig a 400,000 o aelodau undebau llafur yng Nghymru.

Yn ogystal â hyn, bydd gan Shavanah rôl i’w chwarae ledled y DU i arwain ymgyrch TUC i gynyddu nifer y cynrychiolwyr BAME sydd yn y mudiad undebau, ochr yn ochr â thasglu gwrth-hiliaeth TUC.

Mae’n cymryd yr awenau gan Martin Mansfield a ddaliodd y swydd am 12 mlynedd o 2008 ymlaen.

“Mae gan ein mudiad undebau llafur rôl hollbwysig i’w chwarae i sicrhau ein bod yn adeiladu Cymru well a thecach wrth i ni adfer ar ôl pandemig Covid. Rydw i wrth fy modd y bydda i’n gallu chwarae fy rhan fel Ysgrifennydd Cyffredinol TUC Cymru.  

“Mae’r argyfwng dros y flwyddyn ddiwethaf wedi tynnu sylw at yr anghydraddoldebau dwfn yn ein cymdeithas. Unwaith eto, gweithwyr BAME, gweithwyr dosbarth gweithiol a gweithwyr ifanc sydd wedi wynebu’r caledi mwyaf.                         

“Ond rydw i’n credu bod y pandemig hefyd wedi agor llygaid llawer o bobl. Ac mae awydd cynyddol am newid go iawn. Fel undebau llafur, mae angen i ni fanteisio ar y cyfle i adeiladu, tyfu ac ennill ar faterion allweddol sy’n bwysig i weithwyr.

“Mae gennym ni agenda uchelgeisiol ac ymarferol ac rydyn ni’n edrych ymlaen at weithio gyda Llywodraeth Cymru, ochr y cyflogwr a phartneriaid cymdeithasol ehangach i ddarparu gwaith teg i weithwyr ledled Cymru.”