Mae’r undebau llafur yng Nghymru’n cydweithio dros hawliau gweithwyr yn ystod y pandemig Coronafirws

Ar hyn o bryd mae’r TUC yn ymgyrchu dros Dâl Salwch i bob gweithiwr a thâl ar gyfer y rhieni sy’n cymryd amser i ffwrdd i ofalu am eu plant. Mae undebau llafur yng Nghymru hefyd yn cydweithio i ymgyrchu dros weithwyr yn eu sectorau.

Undebau iechyd a’r GIG

Mae TUC Cymru ac undebau iechyd eraill wedi llofnodi llythyr yn galw ar Lywodraeth Cymru i wneud y canlynol:

• Cychwyn profion torfol ac olrhain holl weithwyr y GIG a’u teuluoedd, ynghyd â staff megis gweithwyr gofal sy’n gweithio gyda grwpiau agored i niwed mewn gwasanaethau rheng flaen eraill.
• Darparu Cyfarpar Diogelu Personol (PPE) ar frys i holl weithwyr y GIG a phobl eraill sy’n gweithio ag achosion posibl megis meddygon, gofalwyr a phorthorion.
• Cyflwyno profion rheolaidd ar gyfer yr holl gleifion mewnol presennol a’r rhai newydd.
• Creu llwybr derbyn safonol sydd wedi’i gytuno arno ar gyfer asesu a phrofi unrhyw un sy’n arddangos symptomau anadlol/COVID-19 ym mhob gwasanaeth rheng flaen meddygol ac arbenigol, nid ar gyfer meddygon teulu a’r adran damweiniau ac achosion brys yn unig (ee gwasanaethau iechyd meddwl, pediatreg, radiograffeg ac ati).
• Gwahardd pob ymweliad i’r ysbyty sydd ddim yn angenrheidiol ar unwaith.
• Gwneud yn siŵr bod holl staff y GIG yn cael eu cynghori ynghylch sut i weithio’n ddiogel a’u bod yn gallu cymryd digon o gyfnodau gorffwys er mwyn osgoi gorflino.
• Gohirio ffioedd llety ysbytai dros dro ar gyfer y staff yn syth.

Darllenwch y llythyr yn llawn ac os ydych chi’n weithiwr iechyd yng Nghymru, llofnodwch y llythyr eich hunan.

Incwm ar gyfer gweithwyr llawrydd yn y celfyddydau a’r cyfryngau

Mae Ffederasiwn yr Undebau Adloniant yn galw ar Lywodraeth y DU i gyflwyno gwarant incwm i weithwyr llawrydd a hunangyflogedig wrth i COVID-19 ledaenu. Maent yn dweud:

“Mae goleuadau theatrau wedi’u diffodd, mae lleoliadau cerddoriaeth yn dawel ac mae cynyrchiadau ffilm a theledu wedi cau. Mae dyddiaduron gwaith newyddiadurwyr a thynwyr lluniau yn wag.

“Dydy’r rhan fwyaf o weithwyr llawrydd ddim yn gymwys i gael tâl salwch statudol os nad ydynt yn gallu gweithio oherwydd y feirws a’r unig opsiwn sydd ganddynt yw’r Lwfans Cyflogaeth a Chymorth a Chredyd Cynhwysol. Mae’r budd-daliadau lles hyn ar gyfer y bobl hynny sydd ar incymau isel neu ddim incwm o gwbl, felly nid ydynt yn briodol ar gyfer y rheini sy’n gwneud bywoliaeth o hunangyflogaeth.

“Mae angen i’r Llywodraeth gamu i mewn ar unwaith i’n helpu ni.”